له‌كۆبوونه‌وه‌ی‌ یه‌كشه‌ممه‌ی‌ لایه‌نه‌ سیاسییه‌كان له‌گه‌ڵ‌ سه‌رۆكی‌ هه‌رێم، پرسی‌ پێكهێنانی‌ حكومه‌ت یه‌كلایی‌ ده‌كرێته‌وه‌
سایتی چاودێر- تایبه‌ت: له‌كۆبوونه‌وه‌ی یه‌كشه‌ممه‌ی داهاتوودا كه‌بڕٍیاره‌ لایه‌نه‌ سیاسییه‌كان له‌ هه‌ولێر له‌گه‌ڵ سه‌رۆكی هه‌رێم ئه‌نجامی بده‌ن، پێویسته‌ پرسی پێكهێنانی حكومه‌ت یه‌كلایی بكرێته‌وه‌.
چاودێرێكی سیاسی تایبه‌ت به‌ سایتی چاودێری ڕایگه‌یاند:


پێكهێنانی كابینه‌ی حكومه‌تی داهاتوو زۆر له‌كاتی خۆی دواكه‌وتووه‌ بۆیه‌ پێویسته‌ یه‌ك شه‌ممه‌ی داهاتوو له‌هه‌ولێر ئه‌و پرسه‌ یه‌كلایی بكرێته‌وه‌و بۆشایی سیاسی عێراق پڕ بكرێته‌وه‌.
وتیشی: كاتی ئه‌وه‌ هاتووه‌ سه‌ركرده‌ سیاسیه‌كانی عێراق به‌ئه‌ركی ده‌ستووریی خۆیان هه‌ستن‌و كۆتایی به‌و ته‌نگژه‌ی پێكهێنانی حكومه‌ت بێنن‌و ده‌نگ‌و پاڵپشتی لایه‌نگرانیان له‌بیر نه‌كه‌ن كه‌له‌ هه‌ڵبژاردنه‌كه‌ی "7/3"، متمانه‌یان پێ به‌خشیون.
ئه‌و چاودێره‌ سیاسیه‌ ڕونیشی كرده‌وه‌: پێویسته‌ چیتر عێراق نه‌كه‌وێته‌ ژێر پاڵه‌په‌ستۆكانی پێشنیاری وڵاتانی دراوسێ‌و پێویسته‌ خۆیان به‌زووترین كات پێكهێنانی حكومه‌تی نوێ رابگه‌یه‌نن.
جه‌ختیشی كرده‌وه‌: له‌و كۆبونه‌وه‌یه‌ی كه‌ بڕیاره‌ له‌ یه‌ك شه‌ممه‌ی داهاتووی له‌هه‌ولێر به‌ڕێوه‌بچێت‌و بڕیاریشه‌ "سه‌ركرده‌ی لیستی ده‌وڵه‌تی یاسا، ره‌وتی سه‌درو، سه‌رۆكی لیستی عێراقیه‌" ئاماده‌ی بن.
وتیشی: پێویسته‌ چیتر كات به‌فیڕۆ نه‌ده‌ن‌و هه‌موو لایه‌نه‌كانی عێراق سازش له‌سه‌ر هه‌ندێك له‌ مافه‌كانیان بكه‌ن بۆ ده‌رچوون له‌و ته‌نگژه‌یه‌ی ئێستا.
ڕایگه‌یاند: پێویسته‌ له‌و كۆبونه‌یه‌دا كه‌ له‌گه‌ڵ سه‌رۆكی هه‌رێمی كوردستان ئه‌نجام ده‌درێ لایه‌نه‌كان بگه‌نه‌ رێككه‌وتنێك له‌باره‌ی پێكهێنانی حكوومه‌ته‌وه‌.
ئاماژه‌ی به‌وه‌ش كرد: كه‌ ئومێد هه‌یه‌ ئه‌مجاره‌ لایه‌نه‌كان بگه‌نه‌ رێككه‌وتن، چونكه‌ دوای چوار مانگ له‌ گفتوگۆی‌و كۆبوونه‌وه‌ی جیاجیای لیسته‌كان نه‌گه‌شونه‌ته‌ هیچ ڕێككه‌وتنێك له‌باره‌ی پێكهێنانی حكومه‌تی نوێی عێراقه‌وه‌.